சீதையின் பாதம்.. சிற்பக் கலைக்கூடம்.. - லெபக்ஷி, ஆந்திரா (பாகம்: 2)

#1

#2

வீரபத்திரர் ஆலயத்தின் உயர்ந்த கொடிமரத்தைத் தாண்டிக் கோயிலுக்குள் நுழைந்ததும் வரவேற்கிறது நாட்டிய மண்டபம். 

#3

அரங்கின் தூண்களில் அற்புதமான ஆளுயரச் சிற்பங்கள்! சுமார் 100 தூண்களைக் கொண்ட இந்த மண்டபத்தில் 12 தூண்களில் இசைக் கருவிகளை வாசிக்கும் கலைஞர்களின் சிற்பங்கள் செதுக்கப்பட்டுள்ளன. 

#4

ஒரு தூணின் அடிப்பாகம் மட்டும் தரையிலிருந்து சுமார் 1 அங்கல அளவு உயர இடைவெளியுடன் ஒரேயொரு புள்ளியில் மட்டும் பூமியைத் தொட்டு நிற்கிறது. இதைப் பார்க்கத் தவறி விட்டோம். 

அதே போல பார்க்கத் தவறிய மற்றொரு இடம், விருபண்ணாவின் விழிகள் பிடுங்கி சுவற்றில் எறியப்பட்டதால் ஏற்பட்ட இரத்தக் கறைகள். அதாவது நிதித்துறைப் பொறுப்பிலிருந்த விருபண்ணா  இக்கோயிலைக் கட்டுவதற்காக அரசாங்கத்தின் பணத்தை ஏராளமாக விரயம் செய்து வருவதாக மன்னருக்குச் சொல்லப்பட அவரோ விருபண்ணாவின் கண்களைக் குருடாக்கி விடுமாறு உத்தரவிட்டிருக்கிறார். செய்தியை அறிந்த விருபண்ணா தன் நேர்மையை நிரூபிக்கும் வண்ணமாகத் தானே தன் விழிகளைப் பிடுங்கிக் கோயில் சுவற்றில் எறிய அப்போது வழிந்த இரத்தக் கறைகள் இங்கு ஒரு சுவற்றில் காணப்படுகின்றன.

ஒரே கல்லில் செதுக்கப்பட்ட மூன்றடுக்குகளாகச் சுருண்டு நிற்கும் 18 அடி உயர ஏழுதலை நாகலிங்கம்:

#5

நான்கு சகோதரர்களால் ஒரு மணி நேரத்தில் ஒரே கல்லில் செதுக்கப்பட்ட இச்சிலைக்குப் பின்னாலும் ஒரு சுவாரஸ்யமான கதை சொல்லப்படுகிறது. சிற்பிகளின் தாய் உணவு சமைப்பதற்குச் சற்று நேரமாகும் எனச் சொல்லிச் செல்ல, அதற்குள் வேலையைப் பார்க்கலாமென சமையலறைக்கு முன்னால் இந்தச் சிலையைச் செதுக்க ஆரம்பித்து, அவர் வரும் முன் ஒரு மணி நேரத்திற்குள்ளாக  வடித்து விட்டிருக்கிறார்கள். சமையலை முடித்து விட்டு வெளியே வந்த தாய் சிலையைப் பார்த்துக் கண்கள் அகலப் பிரமித்துப் போய் நிற்க அந்த திருஷ்டியினாலேயே மூன்று இடங்களில் விரிசல் விழுந்து விட்டதாகவும் சொல்லப் படுகிறது :) !

#6

ஒற்றைக்கல் சிற்பம்.. நாகப் பிரபாவளியுடன் சிவலிங்கம்..!

எந்த ஒரு சுபகாரியத்தையும் பிள்ளையாரை வணங்கிய பின்னரே தொடங்குவது இன்றுவரை கடைப்பிடிக்கப்பட்டு வருகிறது. பாதியில் நின்று போன கல்யாண மண்டபத்திற்குள் நுழையும் முன் அவ்வாறாக வழிபட்டுச் செல்லவதற்கென எழுப்பப்பட்ட, ஒரே கல்லில் செதுக்கப்பட்ட, கிழக்குத் திசை பார்த்து அருள்பாலிக்கும் பிரமாண்ட விநாயகர்:

#7 

விருபண்ணாவின் மேல் எழுந்த குற்றச்சாட்டினாலும், தன் கண்களை அவர் பறித்து எறிந்து விட்டதாலும் பாதியில் நின்று போனதாகச் சொல்லப்படும், திறந்தவெளிக் கல்யாண மண்டபம்: 

#8

அற்புதமாக வடிக்கப்பட்டச் சிற்பங்களைக் கொண்ட தூண்களோடு கூரையின்றி நிற்கிறது வான் பார்த்து. 

சிவன், பார்வதி திருமண வைபவ மண்டபமாகக் கட்டப்பட்ட இங்கு சிவன், பார்வதி சிற்பங்களோடு திருமணத்திற்கு வருகை தந்த பிற தெய்வங்களின் சிற்பங்கள் ஒவ்வொரு தூண்களிலும் செதுக்கப்பட்டுள்ளன.

#9

நாங்கள் சென்றிருந்தது கிறுஸ்துமஸ் தினத்தில். விடுமுறையின் காரணமாக சரியான கூட்டம். சில பள்ளிகளிலிருந்து சிறுவர் சிறுமியர்கள் சுற்றுலாப் பயணமாகவும் வந்திருக்க ஆற அமரப் படம் எடுக்க முடியவில்லை. எல்லா இடங்களிலும், குறிப்பாக தூண்களின் சிற்பங்களை மனிதர்கள் இல்லாத ஓரிரு கண இடைவெளியில் அவசர அவசரமாக எடுக்க வேண்டியதாயிருந்தது.

# 10

#11

#12

கல்லைத் தாங்கிப் பிடிக்கிறார்களாம் :)!

எங்கெங்கும் கூட்டமாக இருந்ததால் பார்க்க வேண்டிய முக்கியமான சில இடங்கள் விட்டும் போயின. 

# 13

நீண்ட வெளிப் பிரகாரம்

அஸ்திவாரம் ஏதும் போடாமல் சிறு குன்றின் உச்சியில் அமைந்த பெரிய கருங்கல் பாறை (கிரானைட்) மேல்  கட்டப்பட்டுள்ளது இக்கோயில். பாறை ஆமை வடிவில் உள்ளதால் ‘கர்ம சைலா’ (Kurma Saila) என்றும் அழைக்கப்படுகிறது. 

நாட்டிய மண்டபத்திற்கு வெளியே காணப்படும் பாறைகளாலான திறந்த வெளி. 

#14

கோயிலுக்குச் செல்லும் முன்னரே ஒரு சில தகவல்களை அறிந்து கொண்டு சென்றிருந்ததால் சீதையின் பாதத்தைத் தேடிச் சென்று பார்த்து வந்தோம்.

சீதையின் வலது பாதம் பதிந்த இடமென நம்பப் படுகிற இந்தக் கால் தடத்தினுள் வற்றாது நீர் சுரந்து கொண்டேயிருப்பது ஆச்சரியம் அளிக்கிறது. எங்கிருந்து நீர் சுரக்கிறது என்பதை விஞ்ஞானப்பூர்வமாக யாராலும் கண்டுபிடிக்க இயலவில்லை. அதே போல் ‘இவ்வளவு பெரிய பாதமா?’ எனும் கேள்வியை எழுப்புகிறது சுமார் இரண்டரை அடி நீளமும் ஒன்றரை அடி அகலமும் கொண்ட பாதத் தடம். (இந்தப் பாதத்தின் அளவைக் கொண்டு கணிக்கும்போது சீதையின் உயரம் சுமார் 25 அடிகளாக இருக்க வேண்டுமெனக் கருதப்படுகிறது. இராமாயணக் காலத்தில் மனிதர்களின் உயரம் 25 அடிகள் என்கின்றன சில வரலாற்றுக் குறிப்புகள். திரேதா யுகத்தில் மனிதர்களின் உயரம் 25 அடிகள் எனவும், துவாபர யுகத்தில் 15 அடிகளாகக் குறைந்து தற்போது கலியுகத்தில் ஏழிலிருந்து ஒன்பது அடிகளாகி விட்டதாகச் சொல்லப்படுகிறது. 
பெரும்பாலான வரலாற்றுத் தகவல்களையொட்டி எழும் நம் கேள்விகளுக்கு ஆதாரப்பூர்வமான விடைகள் கிடையாதுதானே!)

#15

ஜடாயுவின் இறக்கைகளை ராவணன் வெட்டியதும் இப்பாறையின் மேல் விழவும் சீதை தன் காலைப் பதித்து அதில் நீர் சுரக்கச் செய்து, ஜடாயு அந்நீரை அருந்தி ராமர் வரும் வரை உயிர்த்திருக்க வழி செய்ததாகச் சொல்லப்படுகிறது. 

கோயிலைக் கட்டிய காலத்தில் தங்களுக்கான தட்டுகளைப் பாறையிலேயே செதுக்கி உணவருந்தியிருக்கிறார்கள் சிற்பிகள்.

#16

தாளித் தட்டுகள்

# 17

#18
கோயிலுக்குள் நுழைந்ததும் கொடிமரத்திற்கு வலப்புறமுள்ள வெளிப்பிரகாரம் வழியே சென்று இடதுபக்கம் திரும்பியதும் இருக்கும் பரந்த பாறை மைதானத்தில் ஒரு ஓரத்தில் அனுமனுக்கு எழுப்பட்டிருக்கும் கீழுள்ள மண்டபத்திற்கு அருகே சீதையின் பாதமும், இந்தத் தட்டுகளும் காணக் கிடைக்கின்றன.

#19

*

தகவல்கள்: கோயில் வழிகாட்டி, சுற்றுலாப் பயணிகளுக்கு அளித்த விளக்கங்களில் இருந்து சிலவும், விக்கிப்பீடியா மற்றும் இணையத்திலிருந்து சேகரித்துத் தமிழாக்கம் செய்தவையும்.

**

அடுத்த இரு பாகங்களில் நந்தி சிலையைப் பற்றியும் மேலும் சில தூண் சிற்பங்களின் அழகையும் கண்டு இரசிக்கக் காத்திருங்கள்:)!

***

தொடர்புடைய முந்தைய மற்றும் அடுத்த பதிவுகள்:
* எழு பறவையே.. - வீரபத்திரர் ஆலயம்.. - லெபக்ஷி, ஆந்திரா (பாகம்: 1)

*  பிரமாண்ட நந்தி.. உலகின் 2_வது பெரிய ஒற்றைக்கல் சிற்பம்.. - லெபக்ஷி, ஆந்திரா (3)

* பிரமாண்ட நந்தி.. உலகின் 2_வது பெரிய ஒற்றைக்கல் சிற்பம்.. - லெபக்ஷி, ஆந்திரா (3)

****