இல்லாத எல்லாமும்
வானம் ஒப்புக் கொள்வதற்கு முன்னரே
அவளது இரவு தொடங்கி விடுகிறது
மங்கிய ஒளியில்
பழைய புடவைகளை மடிப்பது போல
பொழுதுகளை மடிமேல் விரித்து நீவுகிறாள்
நைந்து போன அதன் இழைகளில்
முடிவற்ற எண்ணங்களால் நிரம்பி வழியும்
அவளது மனதை அறிந்த தூக்கம்
ஒருபோதும் உள்ளே நுழைவதில்லை
ஆனால் அழைக்கப்படாமல்
உரிமையுடன் நினைவுகள் வருகின்றன
அவளருகில் அமர்ந்து
அவளறிந்த குரல்களில் பேசுகின்றன
அடர்ந்த நிசப்தத்தில்
தமக்குள் சிரிக்கின்றன
நினைவு கூர்கிறாள்
எப்போதோ பற்றிய கரங்களின் ஸ்பரிசத்தை
எங்கும் ஒலித்த பெயர்களை
பல திசைகளில் சுவாசித்த இல்லத்தை
முன்னோக்கி நகராமல்
அவளைச் சுற்றியே சுழல்கிறது கடிகாரம்
நேரத்தை அல்ல
நேரத்தில் எஞ்சியதை அளக்கிறது
இருளே சோர்ந்து போன நிசியில்
கண்கள் அகலத் திறந்திருக்க
அசைவின்றிப் படுத்துக் கிடக்கிறாள்
எண்ணுகிறாள்
சன்னலுக்கு வெளியே மின்னிய
நட்சத்திரங்களை அல்ல
இல்லாதவர்களை
அவளருகிலேயே
கனிவோடு காவலிருக்கிறது
தன்னை வெளிப்படுத்தி
அவளைக் காயப்படுத்த விரும்பாத
நிதர்சனம்...
தனிமை என்பது
மனிதர்கள் இல்லாதிருப்பது அல்ல
இனி இல்லாத எல்லாமும்
அங்கே நிறைந்திருப்பது
*
நன்றி பண்புடன்!
முதலாம் ஆண்டு நிறைவுப் போட்டியில் வெற்றி பெற்ற அனைத்துப் படைப்புகளும் ஒரே சிறப்பிதழாக வெளியாகியுள்ளது. அவற்றை ஒரு சேர வாசிக்கலாம்... "இங்கே".
*
தொடர்புடைய முந்தைய பதிவு:
*
இருந்தது இல்லாமல் போகும்போது வரும் தாக்கம் அழகாய் வெளிப்படுத்தி இருக்கிறீர்கள். அந்த சோகம் மனதில் பதிகிறது.
பதிலளிநீக்குமுதலாம் ஆண்டு நிறைவுப் போட்டியில் வெற்றி பெற்றதற்கு வாழ்த்துகளும், பாராட்டுகளும்.
பதிலளிநீக்குமிக்க நன்றி ஸ்ரீராம்.
நீக்குகவிதையின் ஒவ்வொரு வரியும்,காட்சியாக விரிந்து, புதிய உலகைக் காட்டுகிறது.. பொழுதுகளை மடிக்கும் அழகு கவித்துவ அழகியல்
பதிலளிநீக்குமிக்க நன்றி.
நீக்குதனிமை கவிதை நன்றாக இருக்கிறது. நம்மோடு நினைவுகளில் என்றும் இருப்பதாக நினைத்து கொண்டாலும் , அவர்களுடன் உரையாடி கொண்டு இருந்தாலும் அந்த வெறுமை, அது தரும் வேதனை . காலங்களை தூக்கி ஏறிய முடியாது. காலங்களை மறுபடி கொண்டு வந்து அசை போடுகிறது மனம்.
பதிலளிநீக்குமனம் இருக்கும் வரை நினைவுகள் வந்து கொண்டே இருக்கும் தன்னை மறந்து இமை மூடும் வரை.
இல்லாத எல்லாமும் இருப்பதாக நினைத்துக் கொள்ளும் மனம்
பதிலளிநீக்குபோட்டியில் வெற்றி பெற்றதற்கு பாராட்டுக்கள் வாழ்த்துகள்,வாழ்க வளமுடன்
தொடர்ந்து எழுதுங்கள்.
கருத்துகளுக்கும் வாழ்த்துகளுக்கும் மிக்க நன்றி கோமதிம்மா.
நீக்கு