சில Landmarks - ஹைதராபாத் (1)

 பழமையும் புதுமையும் கலந்த பெருநகரம் ஹைதராபாத். ஒருபக்கம் புராதான முக்கியத்துவம் கொண்ட இடங்கள், மாளிகைகள், கலை நயம் மிக்கக் கட்டிடங்கள். இன்னொரு பக்கம் அசுர வளர்ச்சியில் ஐடி துறை, அதன் மிகப் பிரமாண்டமான அலுவலகக் கட்டிடங்கள். இந்நகரத்திற்கு பிப்ரவரி மாதத்தில் ஒரு வேலை நிமித்தமாக இரண்டரை நாட்கள் சென்றிருந்தோம். கிடைத்த நேரத்தில் சுற்றிப் பார்த்த இடங்கள் தொடராக வரும். சில பிரசித்தி பெற்ற முக்கிய இடங்கள் இந்தப் பதிவில்..! 

ஹைதராபாத் தலைமைச் செயலகம் - சட்டமன்றக் கட்டிடம்:

#1

1913_ஆம் ஆண்டு பாரசீக மற்றும் ராஜஸ்தானி பாணியில் கட்டப்பட்டக் கட்டிடம். முழுவதும் வெள்ளை நிறத்தில், குவிமாடங்கள் மற்றும் அழகிய வளைவுகளுடன் வடிவமைக்கப்பட்டது. ஆறாவது நிஜாமான, மிர் மஹபூப் அலிகானின் நாற்பதாவது பிறந்தநாளை நினைவு கூர்ந்திடும் வகையில் எழுப்பப்பட்ட கட்டிடம். தற்போது தெலுங்கானா சட்டமன்றம் கூடும் இடமாக உள்ளது. 

#2

ஹூஸைன் சாகர் ஏரியைச் சுற்றி அமைந்த லும்பினி தோட்டத்திற்கு எதிரில் உள்ள பொதுத் தோட்டங்களுக்கு மத்தியில் உள்ளது. 

#3

பிர்லா மந்திர் குன்றின் மேலிருந்து பார்க்கும் போது தோட்டங்கள் நீருற்றுகளுக்கு மத்தியில் இரவு மின் விளக்குகளில் ஒளியில் கம்பீரமாகக் காட்சி அளித்தது.

ஹுஸைன் சாகர் ஏரி:

#4

சட்டமன்றக் கட்டிடத்திற்கு எதிரில் இருக்கும் ஹுஸைன் சாகர் ஏரியும், அதன் நடுவே எழுந்து நிற்கும் 58 அடி உயர, ஒரே பாறையில் செதுக்கப்பட்ட (monolithic) புத்தர் சிலையும் பிரபலமானவை. புத்தர் சிலையை அருகே பார்க்க வேண்டுமெனில் வேறுபக்கமாகச் செல்ல வேண்டும். தியாகிகள் நினைவிடத்தை அடுத்து இருக்கும் நுழைவாயில் வழியாக சென்ற போது கிடைத்த காட்சி. ஏரிக்கு நடுவில் புத்தர் வெகுதொலைவில் புள்ளியாக ஒளிருகிறார். 

வாரயிறுதி என்பதால் ஏரியை ஒட்டி அமைந்த பூங்காவில் பொதுமக்கள் மற்றும் சுற்றுலாவிற்கு அழைத்து வரப்பட்ட பள்ளி மாணவர்கள் அதிகமாக இருந்தனர். புத்தர் சிலை வரை சென்று பார்க்க படகு வசதி உண்டு. படகில் செல்ல மிக நீண்ட வரிசையில் மக்களும் மாணவர்களும் காத்திருந்தனர்.

#5

ஹுஸைன் சாகர் ஏரி 1562_ஆம் ஆண்டு இப்ராஹிம் குலி குதுப் ஷா எனும் மன்னரால் குடிநீர் மற்றும் பாசனத் தேவைகளுக்காக செயற்கையாக உருவாக்கப்பட்டது.  இரட்டை நகரங்களான ஹைதராபாத் மற்றும் செகந்தராபாத் இரண்டிற்கும் நடுவே அமைந்துள்ளது.

தெலுங்கானா தியாகிகள் நினைவிடம் [தெலுங்கானா அமர ஜோதி] :

#6

தெலுங்கானா மாநிலத்திற்காக உயிர் தியாகம் செய்தவர்களின் நினைவாகக் கட்டப்பட்ட 136 அடி உயரத்திலான, ஆறு மாடிகளைக் கொண்ட, விளக்கு வடிவிலான நினைவுச் சின்னம் (Telangana Martyrs Memorial). “தெலுங்கானா அமர ஜோதி” என்றும் அறியப்படுகிறது. ஹுசைன் சாகர் ஏரிக்கரையில் உள்ளது. ஸ்டெயின்லெஸ் ஸ்டீல் கொண்டு உருவாக்கப்பட்டது. பளிங்காக ஒளிரும் வெள்ளை நிற ஸ்டெயின்லெஸ் ஸ்டீல்  தூய்மையையும் மஞ்சள் நிற தீபம் தியாகத்தையும் குறிக்கிறது.

#7

1969_ஆம் ஆண்டு தெலுங்கானா தனி மாநிலமாக உருவாக வேண்டும் என்ற கோரிக்கையுடன் பல மாணவர்கள், போராளிகள் போராட்டங்களில் ஈடுபட்டனர். இந்த போராட்டத்தில்  மாணவர்கள் உட்பட 369 போராளிகள் உயிரிழந்தனர். அவர்களின் நினைவாக 1972ல் ஆரம்பித்து 1975ஆம் ஆண்டில் கட்டப்பட்ட நினைவுச் சின்னம், பின்னர் 2014-ல் தெலுங்கானா மாநிலம் உருவானதும், புதிதாக வடிவமைக்கப்பட்டு திறப்பு விழா நடத்தப்பட்டது. தற்போது இது மாநிலத்தின் மக்களுக்கு மிக முக்கியமான வரலாற்றுச் சின்னமாக மாறியுள்ளது.

ஸ்டெயின்லெஸ் ஸ்டீல் பகுதி கண்ணாடியைப் போல் கட்டிடங்களையும் சாலைகளையும் பிரதிபலிப்பது நேரில் பார்க்கையில் மிக அழகாகவும் பிரமிக்க வைப்பதாகவும் இருந்தது.

#8

இந்தியாவிலேயே உயரமான டாக்டர். அம்பேத்கார் சிலை:

#9

ஹுசைன் சாகர் ஏரிக்கு எதிர்ப்புறம் சட்டமன்ற செயலகத்திற்கு அருகே அமைந்துள்ளது. 2023_ஆம் ஆண்டு, ஏப்ரல் 14_ஆம் தேதி, டாக்டர். அம்பேத்காரின் 132_ஆவது பிறந்தநாள் அன்று  திறந்து வைக்கப்பட்ட இந்தச் சிலை. 50 அடி உயர மேடையில், 125 அடி உயரத்திற்கு வெண்கலத்தில்  எழுப்பப்பட்டிருக்கும் இந்த சிலை இந்தியாவிலேயே உயரமான டாக்டர். அம்பேத்கார் சிலையாகும். சுமார் 360 டன் துருப்பிடிக்காத எஃகு மற்றும் 114 டன் வெண்கலம் ஆகியவற்றால் செய்யப்பட்டுள்ளது. சிற்பி ராம். வி. சுதார் என்பவரால் வடிவமைக்கப்பட்டது.

இந்த நினைவிட வளாகத்தினுள் அவரது வாழ்க்கை, சாதனைகளை மக்கள் அறிந்து கொள்ளும் விதத்தில் அருங்காட்சியகம், நூலகம், மாநாடுகள் நடப்பதற்கான மண்டபம் ஆகியன உள்ளன. மேலும் இந்திய அரசியலமைப்பின் முதன்மை வடிவமைப்பாளர் என்ற வகையில் அவரை நினைவு கூர்ந்திட இந்திய பாராளுமன்றத்தை நகல் எடுத்தாற் போலக் கட்டப்பட்ட கட்டிடமும் உள்ளது. இவை அனைத்தும் 11 ஏக்கர் பரப்பளவில் அமைந்துள்ளன. ஏராளமான பொதுமக்கள், சுற்றுலாப் பயணிகள் பார்வையிடும் இடமாக புகழ் பெற்றுத் திகழ்கிறது.

போக்குவரத்து மிகுந்த சாலையில் ஓட்டுநரை நிறுத்தக் கேட்டுக் கொள்ள முடியாமல், வாகனத்தில் இருந்தபடி எடுத்த படம். 

ஹைதை விமான நிலயம்:

#10

நேரம் கிடைக்கும் போது சார்மினார், சௌமஹல்லா மாளிகை, கோல்கொண்டா கோட்டை மற்றும் பிர்லா மந்திர் ஆகிய பிரசித்தி பெற்ற இடங்களைப் பற்றித் தனிப் பதிவுகளாக பகிர்ந்திடுகிறேன். திட்டமிட்டபடி, சமீபத்திய மைசூர் பயணப் பதிவுகளை இன்னும் பகிர்ந்து முடிக்காத நிலையில், ஹைதராபாத் பயணத்தின் முன்னோட்டமாக இருக்கட்டும் என இந்தப் பதிவு..!

***

[இணையத்தில் சேகரித்துத் தமிழாக்கம் செய்த தகவல்கள்].