பொன்னாகும் நெஞ்சே பொறு
வாழ்க்கை, கனவுகளை
அறியாத பாதைகளில்
சிதறடிக்கலாம்
நம்பிக்கை மலரும் தருணத்தில்
கதவுகளை மூடலாம்
விடையில்லாக் கேள்விகளை
விட்டுச் செல்லலாம்
சொல்லிவிட்டு வருவதில்லை
இன்னல்களும் சவால்களும்—
உணர்வுகளை வெளிக்காட்டாத
முகங்களுக்குப் பின்னாலும்,
சுமைகளின் கனத்தை
ஒருபோதும் புலப்படுத்தாத
சொற்களுக்குள்ளும்
ஓசையின்றிப் போராட்டங்கள்
ரகசியமாக நிகழ்கின்றன
சமயங்களில்
திடமான மரக்கிளையும்
வளைந்து போகிறது
தெளிந்த வானம் மேகமூட்டமாய்
சாம்பல் பூசிக் கொள்கிறது
முன்னோக்கி வைக்கும் அடி
முந்தைய அடியை விடவும்
பாரமாகித் தள்ளாடுகிறது
ஆயின்
ஒவ்வொரு வீழ்ச்சியும்
துணிவின் வேர்களை
ஆழமாக்குகிறது
ஒவ்வொரு ரணத்திலும்
ஞானத்திற்கான
சாளரம் திறக்கிறது
கடக்கும் ஒவ்வொரு புயலும்
உள்ளுறைந்த உறுதியை
உணர்த்துகிறது
எங்கோ ஒரு சிறு சுடர்
சரணடைய
எப்போதும் மறுக்கிறது
காலம் மௌனமாக
தன் ரசவாதத்தை
நிகழ்த்துகிறது
துயர் கனிந்து
வலிமையாகிறது
இடர் ஆன்மாவை
செதுக்குகிறது
சோதனைத் தழலில்
காயங்கள் யாவும்
புடமிட்ட
பொன்னாகும் நெஞ்சே பொறு
*
ஒளிப்படம்: ராமலக்ஷ்மி
*
பண்புடன் மின்னிதழில் அறிவிப்பான ஈற்றடிக்கு எழுதப்பட்டு வெளியீட்டுக்குத் தேர்வான கவிதை. தேர்வான மற்ற வெண்பாக்கள், கவிதைகளையும் இந்த இணைப்பில் வாசிக்கலாம்:
நன்றி பண்புடன்!
***
கருத்துகள் இல்லை:
கருத்துரையிடுக