கடினமான பாடம்
மூன்றாவது வரிசையில்
அமர்ந்திருக்கிறான்
சத்தத்திற்கும் சிரிப்பிற்கும் நடுவில்
வருகைப் பதிவேட்டில் மட்டுமே
ஒலிக்கிறது அவன் பெயர்
நாற்காலிகள் தரையில் உரசுகின்றன
பென்சில்கள் பக்கங்களில் விரைகின்றன
மடிக்கப்பட்ட காகிதங்களில்
ரகசியங்கள் சுற்றுகின்றன
அவனுடைய மேசையை
எதுவும் எட்டுவதில்லை
சில நேரங்களில்
அவனுக்கு விடைகள் தெரியும்
ஆனால் அவற்றை
அமைதியாக விழுங்கி விடுகிறான்
கேட்கப்படக் கொடுத்து வைக்காத
வார்த்தைகளாக
மதிய உணவின் போது மைதானம்
வட்டங்களால் நிரம்புகிறது
மலர்களைப் போல குழுக்கள் மலருகின்றன
அவற்றையெல்லாம் கடந்து நடக்கிறான்
இளைப்பாற இடமற்ற நிழலாக
ஆசிரியர் புன்னகைக்கிறார்
மணி சரியான நேரத்திற்கு அடிக்கிறது
நாள் வழக்கம் போல நகர்கிறது
அவனுள் மட்டும் எல்லாம்
உறைந்து நிற்கிறது
குரல்கள் நிறைந்த அறையில்
எல்லோரும் ஏதோவொரு இணைப்பில்
ஒன்றுபட்டவராகத் தோன்றுமிடத்தில்
அவன் கடினமான பாடத்தைக் கற்கிறான்
பலரால் சூழப்பட்டிருந்தாலும்
இவ்வுலகிலிருந்து காணாமற் போக முடியும்
*
படம்: AI உருவாக்கம்
*
நவீன விருட்சம் இதழ்:134_ல்.., நன்றி நவீன விருட்சம்!
***
கருத்துகள் இல்லை:
கருத்துரையிடுக