தொட்டது துலங்கட்டும்..! - விஜயதசமி வாழ்த்துகள்..!

முப்பெரும் தேவியர்

கடந்த இரண்டு வருடங்களாக அவரவர் வீட்டில் சிறிய அளவில் கொலு வைத்து யாரையும் அழைக்க வழியின்றி எங்கு செல்லவும் வழியின்றி நவராத்திரியை வழிபாட்டினைச் செய்தவர்கள் இந்த வருடம் ஆசுவாசமாகி கொண்டாட்ட மனநிலைக்கு வந்திருப்பது ஆரோக்கியமான நேர்மறை அதிர்வலைகளைப் பரப்பியுள்ளது (positive vibes) என்றே சொல்ல வேண்டும்.

நான் சென்று பார்த்த கொலுக்களின் படங்களில் சில முன்னோட்டமாக இந்தப் பதிவில், விஜயதசமி வாழ்த்துகளுடன்..!

தங்கை வீட்டுக் கொலு

கடந்த ஐந்து வருடங்களாகக் கொலு வைத்து வருகிறார் தங்கை.

அது குறித்த முந்தைய பதிவுகள் சில:

ஏரி குளங்களும்.. நவராத்திரி கொலுப் பொம்மைகளும்.. - 2017

நவராத்திரி வாழ்த்துகள் ! - 2018

இந்த வருடக் கொலு:

ஒரு ஒழுங்கோடும் ஆர்வத்தோடும் மட்டுமின்றி ஒவ்வொரு விஷயத்தையும் நுணுக்கமாகக் கவனித்து ரசனையோடு தங்கை வைக்கும் கொலு  அனைவரின் பாராட்டையும் பெற்று வருகிறது.

கீழ் வரும் படத்தில் படிக்கட்டில் இருக்கும் பொம்மைகள் பலவற்றைத் தனித்தனியாகப் படமெடுத்து முன்னரே முந்தைய பதிவுகளில் தந்திருக்கிறேன். 

மைசூர் தசராவைக் கருவாகக் கொண்டு உருவானது இடப் பக்கம் இருக்கும் பொம்மைக் காட்சி. மைசூர் சாமுண்டி மலை மற்றும் சுற்றியுள்ள கிராமத்தையும் காணலாம்;

#2

கீழ்வரும் படத்தில் இடப் பக்கம் இருப்பவை கிருஷ்ணாவதாரக் காட்சிகள். இந்த வருடம் புதிதாகக் கொலுவில் சேர்க்கப்பட்டவை. அனைத்துப் பொம்மைகளும் மிக அழகாக வடிவமைக்கப்பட்டுள்ளன. இவற்றை பின்னொரு சமயம் தனித் தனிக் காட்சிகளாகப் பகிர்ந்திடுவேன்:).

#3

துர்கா தேவி

#4

லக்ஷ்மி தேவி

#5

ஓவியர் ரவிவர்மாவின் நின்று அருள் புரியும் லக்ஷ்மி தேவியின் ஓவியத்தை அடிப்படையாகக் கொண்டு பொம்மை செய்பவரிடம் தங்கை தயாரிக்கச் சொல்லி உருவாக்கியது. ரவி வர்மாவின் ஓவியத்தில் சரஸ்வதி பாறை மேல் அமர்ந்தபடி அருள் பாலித்திருப்பார் என்றாலும் தங்கை கேட்டுக் கொண்டதன் பேரில் சரஸ்வதி தேவியையும் அவ்வாறே நிற்கும் கோலத்தில் வடிவமைத்திருக்கிறார் பொம்மை செய்தவர்.

சரஸ்வதி தேவி

#6

மேலும் புதிய வரவுகளாகக் கனிந்த முகங்களோடு,

நாரத முனிவர்

#7

ஓளவையார்

#8

அண்ணன் வீட்டுக் கொலு

அண்ணனும் (பெரியம்மா மகன்), மதினியும் (அண்ணி) கடந்த 32 வருடங்களாகத் தவறாமல் கொலு வைத்து வருகிறார்கள். இந்த வருடம் மகளின் பிரசவத்திற்காக அமெரிக்கா சென்றிருந்தவர்கள் சரியாகக் கொலுவுக்கு முன் தினம் வீடு திரும்பி இரவோடு இரவாக வைத்த 33_ஆம் வருடக் கொலு :).

#9

இந்தக் கொலுவின் விசேஷங்களில் ஒன்று பல பொம்மைகள் 50 முதல் 80 வருடப் பழமை வாய்ந்தவை. 

குறிப்பாக கீழ் காணும் ராமக் கிருஷ்ண பரமஹம்சர் பொம்மைக்கு 80 வயதுக்கும் மேலிருக்குமாம். கடந்த இரு பத்தாண்டுகளில் வண்ணம் மட்டும் பூசியிருக்கிறார்கள்.

# 10

ராமக் கிருஷ்ண பரமஹம்சர்

#11

எனது வீட்டில் சரஸ்வதி பூஜை வழிபாடு:

தங்கை வீட்டுக் கொலுவில், நான் :)!

*

தொட்டது துலங்கட்டும்..! 

அனைவருக்கும் இனிய விஜயதசமி வாழ்த்துகள்!

**