மீன்களின் கண்ணீர் - மட்சுவோ பாஷோ ஜப்பானிய துளிப்பாக்கள் ( பத்து )

1.
கழுவ விரும்புகிறேன்
இவ்வுலகின் புழுதியை
பனியின் துளிகளால்.

2.
நிலவற்ற இரவு
பலமான காற்று தழுவுகிறது
ஆதிகாலத்தைய தேவதருவை.

3.
நாள் முழுவதும்-
ஆயினும் போதவில்லை வானம்பாடிக்கு,
பாடுகிறது, பாடுகிறது.

4.
பாடுவது வானம்பாடியானாலும்
ஒலிக்கிறது உள்ளுக்குள்
காட்டுக்கோழியின் சோகக் கதறல்.

5.
வழிகாட்டுங்களேன் என் குதிரைக்கு
இந்தப் பெருவெளியில் எங்கே
குயில் பாடுகிறதென்று.

6.
செம்பரத்தையின் நறுமணம்
தோட்டத்தில் ஒரு அறுந்த செருப்பு
காலடித் தோல் மட்டும்.

7.
நிலவு..
சுற்றிச் சுற்றி வந்தேன் குளத்தை
இரவு முழுவதும்.

8.
பிரகாசமான சிகப்பில்
இரக்கமற்ற சூரியன்
இலையுதிர்க்காலக் காற்று.

9.
இந்த வீதியின் வழியே
செல்கிறது யாரும் உடனற்று
இலையுதிர்க்காலத்து மாலை.

10.
வசந்தகாலம் விடைபெறுகிறது
பறவைகள் அழுகின்றன
மீன்களின் கண்கள் கண்ணீரால் ததும்புகின்றன.
***

மூலம்:
ஜப்பானிய மொழியில்: Matsuo Basho
2 டிசம்பர் 2013 அதீதம் இதழுக்காக ஆங்கிலத்தினூடாகத் தமிழாக்கம் செய்யப்பட்டவை. 

***

மட்சுவோ பஷோ (1644 -1694) புகழ் பெற்ற ஜப்பானின் இடோ காலத்துக்கவிஞர். இவரது வாழ்க்கைக் காலத்திலேயே "ஹைக்காய் னொ ரெங்கா"  என்னும் கவிதைவடிவத்தில் பெயர் பெற்றவராக விளங்கினார். சுருக்கமானவையும் தெளிவானவையுமாகக் கொண்டாடப்படும் ஹைக்கூ கவிதைகளில் வல்லுனராக இன்று ஏற்றுக் கொள்ளப்பட்டுள்ளார். ஆசிரியராகத் தொழில் புரிந்த இவரது கவிதைகள் ஜப்பானில் நினைவுச் சின்னங்களிலும், மரபு சார்ந்த இடங்களிலும் பொறிக்கப்பட்டுள்ளன.

இலக்கியத் துறையினரின் சமூக மற்றும் நகர் சார்ந்த வாழ்க்கை முறையைப் புறந்தள்ளி, எழுதுவதற்கான அகத்தூண்டலைப் பெற நாட்டின் பல பகுதிகளிலும் சுற்றித் திரிந்தவர். இவர் பெற்ற நேரடி அனுபவங்களே இவரது கவிதைகளில் ஆதிக்கம் செலுத்துவதைப் பார்க்கலாம். காட்சிகளையும் உணர்வுகளையும் எளிமையான கூறுகளில் அடக்கியவர்.

***