ஈரமாய் இருக்கட்டும் தூரிகை - பண்புடன் புகைப்படப் போட்டியில் முதல் பரிசு

நன்றி பண்புடன்!

கட்டற்ற சுதந்திரத்துடன் எண்ணங்களைப் பரிமாறிக் கொள்ளவென 2005_ஆம் ஆண்டு ஆசிஃப் மீரன் அவர்களால் ஆரம்பிக்கப்பட்ட கூகுள் மின்னஞ்சல் குழுமம்‘பண்புடன்’. இணைய இதழாகவும் இயங்கி வந்ததை அறிந்திருப்பீர்கள்.

‘தண்ணீர்’ என்ற தலைப்பில், குழுமம் நடத்திய புகைப்படப் போட்டியில் நான் அனுப்பிய படத்திற்கு முதல் பரிசு அறிவிப்பாகியுள்ளது:)!

பண்புடன் குழுமத்துக்கும் நடுவர் விழியனுக்கும் என் அன்பு நன்றி!! ரூ. 500 மதிப்புள்ள புத்தகங்கள் பரிசாக வழங்கப்பட உள்ளன.

இரண்டாம் மூன்றாம் பரிசுகளை வென்ற விக்னேஷ், அரசி ஆகியோருக்கு என் நல்வாழ்த்துகள்!
***

தூரிகை முக்கியமா?

PiT போட்டிகளை நான்கு வருடங்களாகத் தொடரும் அனுபவத்தில் அங்கே அடிக்கடி வாசகர் எழுப்பும் கேள்வி ஒன்றையும், சலிக்காமல் PiT உறுப்பினர் குழு வழங்கும் அந்தப் பதிலையும் இங்கே பகிர்ந்திடத் தோன்றுகிறது.

டி எஸ் எல் ஆர் படங்களுக்குத் தனியாகவும், பாயின்ட் அன்ட் ஷூட் படங்களுக்குத் தனியாகவும் போட்டியைப் பிரித்தால் என்ன என்பதே கேள்வி. ‘It's not the brush, it's the Painter' என்பதே குழு சொல்லும் பதில்.

எந்தத் தூரிகையை வைத்துத் தீட்டுகிறோம் ஓவியத்தை என்பது முக்கியமே இல்லை. இதோ இந்தப் படம் எனது Sony W80-ல் எடுத்ததே. இதிலும் Nikon E3700-லும் நான் எடுத்த பல படங்கள் நல்ல பாராட்டைப் பெற்றிருக்கின்றன. மேக் மை ட்ரிப் டாட் காம் உபயோகிக்கும் எனது படம் உட்பட இரண்டு முறை தமிழ்மணம் விருதுகளை வென்ற பதிவுகளின் படங்கள் யாவும் பாயின்ட் அன்ட் ஷூட்டில் எடுத்தவைதான். இரண்டு வருடங்களாக DSLR (Nikon D5000) உபயோகிக்க ஆரம்பித்த பின்னரும், அன்றாட வேலையாக எங்கே வெளியில் சென்றாலும் கூடவே எடுத்தச் செல்ல எளிதாக இருக்கிற வகையில் இப்போதும் P&S உபயோகிக்கவே செய்கிறேன். என்னதான் மொபைலில் அதிக மெகா பிக்ஸல், ஜூம் வசதி வந்து விட்டிருந்தாலும் கேமரா பிடித்து எடுப்பதில்தான் கிடைக்கிறது எனக்குத் திருப்தி:)!

சித்திரமும் கைப்பழக்கம். என்ன சொல்ல வர்றேன்னா தூரிகையைக் காய விடாதீர்கள்:)! எப்போதும் வண்ணங்களில் குழைந்து ஈரமாகவே இருக்கட்டும் அது. தொடர்ந்து படம் எடுத்துக் கொண்டே இருப்பதுதான் நம் திறனை வளர்க்க ஒரே வழி.

***