எனதன்பும் உனதன்பும் - அதீதம் Feb 14 சிறப்பிதழில்..

எனதன்பு மெளனமானதே
எம்மொழியில் முயன்றாலும்
முழுமையாகப் புரியவைக்க
இயலாது போகுமோ
எனும் அச்சத்தால்
நான் அடை காக்கும்
அன்பு மெளனமானதே

ஆயினும்
உனதன்பை நீ சொல்லிக் கொண்டேயிரு.

சந்தர்ப்பங்கள் வாய்க்கக் காத்திராமல்
அடிக்கடி உனதன்பை நீ
வெளிப்படுத்தியபடி இருப்பது
உனக்கு மட்டுமின்றி
எனக்கும் பிடித்திருப்பதால்

தொடர்ந்து
உனதன்பை நீ சொல்லிக் கொண்டேயிரு.

எத்தனை நட்சத்திரங்கள்
வானத்தை நிறைத்தாலும்
எண்ணிக்கை அதிகமென
எண்ணுவதில்லை நிலவு

எத்தனை மலர்கள்
வனமெங்கும் பூத்தாலும்
பரவும் நறுமணத்தால்
திணறுவதில்லை காற்று

எத்தனை முறை உனதன்பை
நீ எப்படிச் சொன்னாலும்
ஒவ்வொரு சொல்லும்
பிரபஞ்சத்தையே பரிசாக
ஏந்தி வருவதாக
மெளனமாக மகிழ்ந்து கொண்டிருக்கும்
எனதன்புக்காக

உனதன்பை நீ சொல்லிக் கொண்டேயிரு.
***

அதீதம் காதல் சிறப்பிதழில்.
படம் நன்றி: MQN