தூறல்:12 - பெங்களூரில்.. கம்ப இராமாயண முற்றோதல், புகைப்படக் கண்காட்சி; புன்னகை உலகில் ‘ங்கா’; In and Out Chennai

“சுவையை அனுபவித்துவிட்டால், 
கம்பனால் என்ன செய்ய முடியும் 
என்பதற்கு எடுத்துக் காட்டு.”

கம்பராமாயண முற்றோதல்:

எழுத்தாளர் சொக்கன் ஒருங்கிணைக்க திரு. ஹரிகிருஷ்ணன் அவர்கள் வழிநடத்த கடந்த இரண்டு சனிக்கிழமைகளாக பெங்களூரில் கம்பராமாயணம் வாசிப்பு நடைபெற்று வருகிறது.

நாள்: சனிக்கிழமை மாலை
நேரம் : மாலை 6 மணி முதல் 8 மணி வரை
இடம்:
CRMIT Solutions Private Limited,
NR Towers, 2nd Floor,
#14, Hundred Feet Ring Road,
BTM Layout First Stage,
Bangalore 68

நிகழ்வு நடக்கும் இடம் வரும் வாரங்களில் மாறக் கூடும். விரிவான விவரங்களை சொக்கன் அவர்களது ‘மனம் போன போக்கில்..’ வலைப்பூவில் இங்கே காணலாம். கலந்து கொள்ள இயலாதவர்களுக்காக நிகழ்வின் ஒளிப்பதிவு பாகங்களாக இங்கே:

வகுப்பு ஒன்று:

 http://www.youtube.com/watch?v=VAsL_y6xCqQ பகுதி 1
 http://www.youtube.com/watch?v=qPexxso0wko பகுதி 2
 http://www.youtube.com/watch?v=zvPRwVJGG0g பகுதி 3
 http://www.youtube.com/watch?v=KuCorRPTq9w பகுதி 4
வகுப்பு இரண்டு:

http://www.youtube.com/watch?v=8MpfLP7NJqY பகுதி 1
http://www.youtube.com/watch?v=rdp7p_uCik4 பகுதி 2

இதே யு ட்யூப் இணையப் பக்கத்தில், இனி நடக்கும் வகுப்புகளின் ஒளித் தொகுப்புகளும் இடம் பெறும் எனத் தெரிவித்திருக்கும் திரு ஹரிகிருஷ்ணன் அவர்கள், “பங்குபெறும் ஆர்வலர்கள், வாரம் ஒருமுறைதான் செய்வதனால், இரண்டு மணி நேரத்துக்கு பதிலாக மூன்று மணிநேரம் ஒதுக்க முடியுமா என்று கேட்கத் தொடங்கிவிட்டார்கள்.  எட்டு மணிநேரம் என்றாலும் ஒதுக்கத் தயார் என்று சொல்லியிருக்கிறேன்.

சுவையை அனுபவித்துவிட்டால், கம்பனால் என்ன செய்ய முடியும் என்பதற்கு எடுத்துக் காட்டு.  கலந்து கொள்ள முடியாதவர்களுக்காகத்தான் இந்தப் பதிவுகள்.  முதல் வகுப்பின் பதிவுக்குக் கிடைத்திருக்கும் பார்வைகள் திகைப்பை ஏற்படுத்துகின்றன.  எண்ணிக்கை ஏறியவண்ணம் இருக்கிறது.  வகுப்பில் கலந்து கொள்பவர்கள் அனைவரும் கம்பராமாயணம் முழுத் தொகுதியும் வாங்குவதற்குச் சென்ற வாரம் முடிவெடுத்திருக்கிறார்கள். 

வரவேற்பு, நான் எதிர்பாராத அளவுக்கு இருக்கிறது.  ஏதோ என்னால் இயன்றது. முளைக்கும் நிலத்தில் விதையைத் தூவிக் கொண்டிருக்கிறேன்.” என மகிழ்வுடன் பகிர்ந்துள்ளார் குழும மடலில்.  “ஹரி கிருஷ்ணன் அவர்களை நேரில் சந்திக்கும் வாய்ப்பு பெற்ற எவரும், அவரது பழகும்விதத்தை, வாசிப்பின் வீச்சை, தமிழ், பிற மொழி இலக்கியங்களின்மீது அவருக்கிருக்கும் அளவற்ற ஆர்வத்தை, அதை எவருக்கும் புரியும்வண்ணம் விவரித்துச் சொல்லும் அக்கறையை, ஒருவரையும் அவமதித்துப் பேச விரும்பாத பண்பான வார்த்தைத் தேர்வுகளையெல்லாம் வியக்காமல் இருக்கமுடியாது.” என சொக்கன்  அவர்கள் தன் பதிவில் சிலாகித்திருப்பது நூறு சதவிகிதம் உண்மை. சென்ற மாதம் திரு. ஹரிகிருஷ்ணன் அவர்களைச் சந்திக்கும் வாய்ப்புக் கிடைத்தது. .. ..

பெங்களுர் தமிழ்ச் சங்கத்தில் ஒரு சங்கமம்:

‘மின்மினிப்பூச்சிகள்’ ஷக்தி பிரபா பெங்களூரிலிருந்து சென்னைக்கு மாற்றாலாகிச் சென்றதையொட்டி ஏற்பாடாகியிருந்த கூட்டத்தில் கலந்து கொண்டவர்கள் நண்பர்கள் ஷைலஜா, ஷக்தி, சொர்ண லக்ஷ்மி, ஐயப்பன் கிருஷ்ணன், ஓம்ஸ்ரீ, திருமால், பேரனுடன் திரு.ஜி.எம். பாலசுப்பிரமணியம், திரு. ஹரிகிருஷ்ணன் ஆகியோருடன் தமிழ்ச் சங்க உறுப்பினர் திரு முகமது அலி. ஆம், சந்திப்பு நிகழ்ந்த இடம் பெங்களூர் அல்சூர் ஏரியைப் பார்த்து அமைந்த தமிழ்ச் சங்கக் கட்டிடத்தின் மாடியில், நூலகத்துக்கு முன் இருந்த அறையில். இதில் என்னையும் இன்னும் ஓரிருவரையும் தவிர்த்து மற்றவர்கள் மரத்தடி குழுமத்தில் அறிமுகமாகி எழுதிக் கொண்டிருந்தவர்கள். ஒவ்வொருவரின் ஆர்வம் மற்றும் எழுத்துலக அனுபவத்தை பகிர்ந்து கொள்ளச் சொன்னதோடு சுய அறிமுகங்களை ஒளிப்பதிவாக்கவும் ஏற்பாடு செய்திருந்தார் திரு. ஹரிகிருஷ்ணன். சந்திப்பு குறித்த ஷைலஜாவின் பகிர்வு இங்கே.

***

புகைப்படக் கண்காட்சி:

26 ஏப்ரல் முதல் 10 மே 2013 வரை நடைபெற உள்ள இந்தப் புகைப்படக் கண்காட்சி வறண்டு வரும், மற்றும் சரியாகப் பராமரிக்கப் படாத ஏரிகள் குறித்த ஆய்வாக, விழிப்புணர்வை ஏற்படுத்தும் நோக்கத்துடன் நடைபெறுகிறது. கொற்கையைச் சேர்ந்த புகைப்பட வல்லுநர்களால் 23 ஏப்ரல் அன்று அதிகாலையில் எட்டு ஏரிகளின் சுற்றுச் சூழல் காட்சிப் படுத்தப்பட்டிருக்கின்றன. அறிவிப்பில் இருக்கும் வர்த்தூர் ஏரியைப் படமாக்கியிருப்பவர் PeeVee. அதே படம் வண்ணத்தில்:

***

In and Out Chennai:


எனது ‘இதுவும் கடந்த போகும்’ சிறுகதையை மார்ச் 1-15 இதழில் வெளியிட்டிருக்கும் In and Out Chennai இதழுக்கு நன்றி!

***

புன்னகை உலகம்:

தேனம்மையின் ‘ங்கா’ கவிதை நூலுக்கு நான் எழுதிய விமர்சனத்தை ஏப்ரல் 2013 இதழில் வெளியிட்டிருக்கும் “புன்னகை உலகம்” வாழ்வியல் மாத இதழுக்கு நன்றி!

***

படத்துளி:

இன்று உலக புத்தகத் தினம்

***