இலைகள் பழுக்காத உலகம் - மலைகள் இதழில்..

கைபிடித்துக் கதைபேசி நடந்த நாட்களும்
பாசத்தால் நனைந்த நிகழ்வுகளும்
நெஞ்சோடு இருந்தாலும்
நிழற்படங்களாலேயே
நினைவில் பொருத்திப் பார்த்தத்
தந்தையின் முகத்தைக்
கண்டேன் கனவில் நேற்று.

கம்பீரத் தோற்றம்
அதே கணீர் சிரிப்பு.

தேடுகின்றன அவர் கண்கள்
தான் விட்டுச் சென்ற
எட்டு வயதுச் சிறுமியை.

ஏற்றுக்கொள்ள இயலவில்லை
மகளென்று
அங்கொன்றும் இங்கொன்றுமாய்
நரையோடும் சிகையோடு
அவரினும்
அதிக வயதாகி நின்றிருந்த என்னை..

மறையாத சூரியனின் வெளிச்சத்தில்
தேயாத முழுநிலவைக் காண முடிகிற
தான் வாழும் உலகில்
வாடாத மலர்களையும்
பழுக்காத இலைகளையுமே
பார்த்துப் பழகிவிட்டவருக்கு.
***

படம் நன்றி: இணையம்

18 ஆகஸ்ட் 2012, ‘மலைகள்’ எட்டாவது இதழில்., நன்றி மலைகள்.காம்!