போகுமிடம் வெகுதூரமில்லை-PiT-ன் இந்த வார சிறந்த படமாக

3 ஏப்ரல் 2010, PiT தளத்தில் இந்த வார சிறந்த படமாக கீழ் வரும் எனது படம் பரிசு பெற்றுள்ளது என்பதை மகிழ்வுடன் பகிர்ந்து கொள்கிறேன். நன்றி PiT!

போகுமிடம் வெகுதூரமில்லை

PiT தளத்தில் வாழ்த்தியிருந்தவர்களுக்கும், Flickr தளத்தில் போற்றியிருந்தவர்களுக்கும் இங்கும் என் நன்றிகள்.

இப்படத்துக்கு நான் செய்த பிற்தயாரிப்பு, PiT-ல் கற்ற பாடமே.

இந்த வார சிறப்புப் படம் எப்படித் தேர்வாகிறது? தெரியாத சிலருக்காக இந்தத் தகவல்கள்:

நீங்கள் புகைப்படங்கள் எடுப்பதில் ஆர்வமுள்ளவரா? எடுத்த படங்களை மற்ற ஆர்வலர்கள், வல்லுநர்கள், நண்பர்களுடன் பகிர்ந்திட விருப்பமா? Flickr-ல் ஒரு கணக்கை ஆரம்பியுங்கள். இது ஒரு இலவசச் சேவையே. கூடுதல் வசதிகள் தேவையெனில் பணம் செலுத்தி Pro Account ஆக்கிக் கொள்ளலாம்.

அடுத்து PiT Group-ல் இணைந்திடுங்கள். அதன் பின்னர் அங்கு நீங்கள் பதிகின்ற படங்களில் பிடித்தவற்றை PiT Group-ல் சேர்த்து வரலாம். ஒரு நாளுக்கு இரண்டுவரை அனுமதி. இணைக்கும் படங்களின் எண்ணிக்கைக்கு இணையாக மற்ற படங்களுக்கு கமெண்ட் வழங்க வேண்டும் என்பது விதி. ஆனால் உங்களால் இரண்டு கமெண்டுகளுடன் நிறுத்த முடியாது என்பது அங்குள்ள அழகுப் படங்கள் செய்யும் மாபெரும் சதி:)!

PiT Group படங்களை இந்தத் தளத்திலும் நீங்கள் கண்டு ரசிக்கலாம்: Flickriver .

இப்படியாக சேர்க்கப்படும் படங்களில் சிறந்த ஒன்றிரண்டைத் தேர்ந்தெடுத்து ஒவ்வொரு வாரமும் சனிக்கிழமையன்று ‘இந்தவார சிறந்தபடம்’ என PiT தளத்தில் அறிவிக்கிறார்கள் PiT குழுவினர். குழுவிலுள்ள ஒவ்வொருவரும் ஒவ்வொரு வாரம் நடுவராக செயல் படுகிறார்கள்.

PiT group-ல் இணைவதில் என்னென்ன நன்மைகள்? பார்வைக்காக வைக்கப்படும் படங்களிலுள்ள நிறைகுறைகளை நண்பர்கள் ஒருவருக்கொருவர் சுட்டிக் காட்டிக் கொள்கிறார்கள். ஆலோசனைகள் வழங்கிக் கொள்கிறார்கள். இந்த முறை நம்மை மேம்படுத்திக் கொள்ள உதவும். அதுமட்டுமின்றி மற்றவர்கள் எப்படி படங்கள் எடுக்கிறார்கள் என்பதைத் தொடர்ந்து கவனித்து வருவதும் ஒரு சிறந்த பயிற்சியே. அடுத்தமுறை நாம் படம் எடுக்கையில் கோணங்கள் முதற்கொண்டு நாம் பார்த்தவை கை கொடுக்கும்.

அதே போல PiT நடத்தும் மாதப் போட்டிகளில் கலந்து கொள்ளும் படங்களைக் கவனிப்பதும் இவ்வகைப் பயிற்சிக்கு மிகவும் உதவுகின்றன. கடந்த மாதப் போட்டியான ‘ஒற்றை’ தலைப்புக்குக் கலந்து கொண்டவர் எண்ணிக்கை 91. கடைசி தினம் வரை 'ஜே ஜே'தான். ஒவ்வொரு நாளும் எத்தனை புது எண்ட்ரி என நம் மக்களும் சளைக்காமல் காத்திருந்து, பார்த்துப் பார்த்துக் கமெண்ட் மழை பொழிந்தார்கள்.

ஒவ்வொரு சுற்றிலும் முன்னேறிய படங்களையும், விலக நேர்ந்த படங்களையும் சிரத்தையுடன் விமர்சித்திருந்தார் கருவாயன். ஆர்வமுள்ளவர்கள், பரிசு என்பதைத் தாண்டி, ‘கற்றுக் கொள்ள’ எனும் நோக்கத்துடன் இதற்காகவே கலந்து கொள்ளலாம்.

சரி, இந்த மாதப் போட்டித் தலைப்பு என்ன தெரியுமா? ‘தண்ணீர்’! ஏற்கனவே கச்சேரி இங்கே களைகட்ட ஆரம்பித்து விட்டது. வாங்க நாமும் ‘பிட்’டுக்குத் தண்ணி காட்டலாம்:)! கடைசித் தேதி:15 ஏப்ரல் 2010.